Komuniteti Mysliman nxjerr jashtë loje besimtarët, mohon zgjedhjet

Komuniteti Mysliman Shqiptar ndodhet tashmë përpara zhgjedhjeve të Këshillit të Përgjithshëm, i cili është një institucion që është konceptuar të funksionojë si parlament i këtij komuniteti. Këto zgjedhje janë tepër të rëndësishme, pasi prej tyre zgjidhen të gjitha strukturat e tjera, deri tek Kryetari i KMSh-së. Aktualisht duket se afrimi i zgjedhjeve ka vënë në lëvizje drejtuesit e KMSH-së për të thelluar edhe më tej uzurpimin e këtij institucioni, duke shfuqizuar verdiktin e besimtarëve nga përfaqësimi I tyre në parlamentin e muslimanëve në këtë vend. Bëhet e ditur se drejtuesit e lartë të këtij institucioni, kanë shkelur rëndë statutin në lidhje me zgjedhjen e përfaqësuesve të Tiranës. Ata kanë shpërfillur të drejtën e përfaqësuesve të xhamive të Tiranës, për të marrë pjesë në seancën e zhvilluar në Myftininë e Tiranës, prej nga do të zgjidhen edhe anëtarët e Tiranës në këtë Këshill.

Puçi institucional

Për të kuptuar më mirë shkeljen po sqarojmë se, sipas statutit, të drejtën për zgjedhjen e anëtarëve të Këshillit të Përgjithshëm e kanë: Myftiu, imamët e xhamive si dhe përfaqësuesit e dalë nga zgjedhjet e xhamive. Aktualisht, në Myftininë e Tiranës, zgjedhja e anëtarëve për në Këshillin e Përgjithshëm duhet të ishte bërë nga:

1. Myftiu,
2. Imamët e Tiranës
3. Përfaqësuesit e dalë nga zgjedhjet e zhvilluara në xhami, numri i të cilëve shkon në mbi 65 pjesëmarrës.

Ajo që ka ndodhur, ka qenë një shkelje flagrante e cila përbën një puç insitutcional, që e nxjerr krejtësisht të jashtligjshme veprimin e myftinisë, e për pasojë edhe përfaqësuesit e Tiranës në Këshillin e Përgjithshëm. Aktualisht, në mbledhje, drejtuesit e lartë të KMSH-së kanë thirrur në mbledhje vetëm dy imamë dhe asnjë tjetër, si dhe asnjë përfaqësues nga xhamitë. Pra konkretisht, anëtarët e Këshillit të Përgjithshëm nuk po dalin nga zgjedhjet por nga përzgjedhjet e klaneve që sundojnë me metoda despotike mesjetare Komunitetin Mysliman.

Në mbledhjen e myftinisë për këtë gjë, imametë e thirrur, Ahmed Kalaja dhe Lulzim Ploçi, kanë denoncuar këto shkelje, por janë ndeshur me arrogancën dhe iracionalitetin e drejtuesve të mbledhjes të cilët nuk e marrin aspak në konsideratë statutin e institucionit që drejtojnë. Nga ana tjetër, mësojmë se në shumicën e xhamive në Shqipëri, nuk janë bërë fare zgjedhje, gjë që delegjitimon parlamentin e ardhshëm.

Diktatura gyleniste

E gjithë kjo, përbën një akt të rëndë uzurpimi, që shkel mbi të gjitha principet themelore të parimeve, ligjeve dhe garantit të jetës fetare në vend. Gjithashtu, ky akt, përbën një shkelje flagrante të frymës minimale demokratike që kërkon çdo bashkësi për të funksionuar siç duhet. Shkelja e parimeve të tilla, do të thotë se ky komunitet po bëhet gjithnjë e më shumë një institucion që nuk përfaqëson bashkësinë në krye të së cilës është. Akte të tilla, përbëjnë dhunim të dinjitetit dhe të drejtave themelore të bashkësisë muslimane, si dhe shkelje të garantit që kjo bashkësi ka në shoqërinë shqiptare. Akte të tilla, në çdo vend demokratik do të alarmonin të gjithë shoqërinë, aq më tepër kur bëhet fjalë për një shoqëri si ajo shqiptare, e cila kërcënohet nga brishtësia e ekuilibrave, jetike për këtë shoqëri.

Në fakt, është normale që uzurpuesit e KMSH-së, të cilët i përkasin një sekti të vogël e pa peshë në botën islame, të njohur si sekti nurxhi, nuk do të ppërfillnin bashkësinë të cilën kanë marrë përsipër të drejtojnë. Kjo sepse ata nuk e përfaqësojnë atë. Ata po drejtojnë një bashkësi, të cilës nuk i përkasin dhe me të cilën ndajnë bindje të ndryshme fetare, ndaj dhe, për ta drejtuar atë, do të duhet fillimisht ta nxjerrin njëherë jashtë loje. Ky është një akt i rëndë, të cilit ia kalon vetëm ai i vitit 67. Atëherë KMSH-ja u nxorr jashtë ligjit, ndërsa tani, po u merret nga duart besimtarëve.